شوربة السي فود لمحبي الاكلات البحرية
كلنا خلاص مش عوزين شوربة الفراخ واللحمة عوزين تغير ،
وشوربة السي فود
وميزتها انها سهلة جدا ، وممكن تحتفظي بالمكونات البحرية النظيفة والمقطعة ف كيس ف الفريزر ،
وبقية المكونات كمان تحفظ مفرية في اكياس في الفريزر لحين الاستعمال ......
المكونات
- قطعتين او ثلاثة صغير (5×5سم تقريبا) لحم سمك بالعظم او من غير ،
انا استعملت الهامور او اي نوع سمك ، ومقطعة قطع صغيرة.
- كابوريا صغيرة ، نفتح ونشيل الغطاء ونقسم الجسم نصين ،
نشيل الخياشيم بتاعتها ،
ونحتفظ بالقراصات كمان علشان ح نستعملها .
- جمبرى مقشر
- سيبيا "سبيط" مقطعة مربعات
بكلويز لو موجود ، وطبعا يكون منقوع قبلها ف الماء بفترة كافية علشان مايكونش فيه رمل .
- معلقتين اكل بصل مفري
- مقدار كبشة يد كرفس اخضر مقطع صغير
( الكرفس ده طويل وعريض زي الكرات او البصل الاخضر تقريبا )
- ملح ، شطة، ذرة كمون ، معلقتين زيت .
على فكرة مش شرط تحطي كل المكونات دي بس الاساسية الكابوريا
والجمبري هي اللى بتديها الطعم الخطير .
كمان الكميات دي مش اساسية بس الافضل
انك لو حتحطي كل الحاجات دي تحطي من كل حاجة كمية قليلة
وح تجمل معاكي ف الاخر بكمية مش بطالة
الطريقة سهلة جدا جدا جدا
نحمر البصل ف الزيت ونحط عليه نص مقدار الكرفس
ويدوبك يبدل بسيط وقبل ما يصفر نحط السيبيا وعليها الماء والملح والكمون والشطة
اذا حبيتي تحطيها ونخليها تغلي شوية قبل مانضيف بقيت المكونات
علشان هي بتاخد وقت في السوا اكتر من باقي المكونات.
بعد 10 دقايق تقريبا حطي بقيت المكونات وزودي الماء لغاية ما يغطيها
وشوية كده وطبعا كل ما الماء كميته تقل الشوربة تكون مركزة اكتر .
وسيبيهم يغلوا لغاية مايستووا ومش ح ياخدو وقت خالص
يعنى في خلال نص ساعة تقريبا حلاقي عندك شوربة سهلة ومفيدة
ومشبعة كمان . وتقعدي تقزقزي بقأة براحتك ههههههههه
ملاحظة هامة جدا جدا
اي مأكولات بحرية تحبي تطبيخيها لازم تكون مكشوفه علشان ريحة الزفارة تروح منها .
يعنى الشوربة ديه اما تسيبيها مكشوفة
او تغطيها بغطاء موارب .
وجربوها وقولولي رايكم بصراحة
والف هنا وشفا.
